Татарстан Фәннәр академиясендә «Ел инновациясе» конкурсының беренче этабы финалистлары якланды
Проектларны Татарстан Фәннәр академиясе президенты Рифкать Миңнеханов, ТР ИВФ директоры Дамир Гаиев, шулай ук конкурсның экспертлар советы тыңлады. Проектлар өч номинация буенча тыңланды: перспектива, корпоратив инновация һәм студентлар стартабы.
Ел инновациясе – төбәкнең технологик компанияләренең конкурентлыкка сәләтлелеген арттыру максатларында Татарстан икътисадына инновацион, импортны алмаштыра торган технологияләрне кертү, фәнни производстволарны үстерү өчен шартлар тудыруга юнәлдерелгән конкурс. Оештыручылар – Татарстан Республикасы Инвестиция-венчур фонды, Татарстан Республикасы Мәгариф һәм фән министрлыгы һәм Татарстан Республикасы Фәннәр академиясе.
«Ел инновациясе» конкурсы – Татарстан фәнен, мәгарифен һәм икътисадын үстерү өчен куәтле корал. Аның тарихында беренче мәртәбә өстенлекләр «Татарстан Республикасын фәнни-технологик үстерү» дәүләт программасы һәм дөнья дәрәҗәсендәге фәнни-мәгариф үзәге эшчәнлеге белән тулысынча бәйләнгән. Без яшьләрнең, студентларның, уйлап табучыларның һәм эре компанияләрнең республиканың технологик лидерлыгына үз өлешләрен кертүләрен, гамәли бурычларны хәл итәргә һәм импортны алмаштыра торган алдынгы технологияләрне гамәлгә кертергә омтылуларын күрәбез. Бу илебез фәненең һәм сәнәгатенең киләчәге ышанычлы кулларда булуына ышаныч бирә», — дип билгеләде Рифкать Миңнеханов, ТР Фәннәр академиясе президенты.
Конкурсның гомуми приз фонды 5 миллион сум тәшкил итә. Финалга чыгучылар республиканың иң яхшы технологик чараларында катнашу, шулай ук эре инвесторларның күз уңына эләгү мөмкинлеген алачак. Компанияләр үз проектларының конкурент дәрәҗәсен тикшерәчәк һәм кыйммәтле тәҗрибә алачак.
Стартапларны Татарстанның фәнни, мәгариф һәм бизнес җәмәгатьчелеге профессионаллары бәяләде:
Диас Сафин, генераль директор, «Идея» технопаркы;
Дмитрий Дергачев, өлкән аналитик, Татарстан Республикасы Фән һәм технологияләр фонды;
Булат Сафиуллин, аналитик, Татарстан Республикасы Фән һәм технологияләр фонды;
Александр Симонов, аналитик, Татарстан Республикасы Фән һәм технологияләр фонды;
Тимур Хәлитов, Татарстан Республикасы Фән һәм технологияләр фонды директоры;
Васил Зәкиев, «Иннополис» университеты технологик эшкуарлык магистратурасы укытучысы;
Марат Җиһаншин, директор, КФУ А.М.Бутлеров ис. химия институты;
Владимир Кутилов, генераль директор, «Дарвин теориясе» ҖЧҖ һәм «Цифрлы мобилизация» ҖЧҖ;
Арсен Савва, директор, «ТР Фәнни-техник мәгълүмат үзәге» ДАУ;
Марат Сафиуллин, вице-президент, ТР Фәннәр академиясе;
Ленар Фәйзетдинов, җитәкче киңәшчесе, ТР Рәисе Администрациясе;
Сергей Хантимеров, җитәкче, Е.К.Завойский исемендәге Казан физика-техника институты, РФА Казан фәнни үзәге.
«Быел «Ел инновациясе» конкурсы яңа дәрәҗәгә чыкты. Без әзер карарларга игътибарны юнәлтеп, формат трансформациясен уздырдык – идеяләрдән без бизнес-потенциалга ия прототипларга һәм проектларга күчтек. Башлангыч этапта без 500дән артык гариза алдык, шулардан финалистларны сайлап алачакбыз. «Перспектива» номинациясендә инновацион проектлар белән мәктәп укучылары катнаша, ә «Студентлар стартабы» номинациясендә университетның технологик эшкуарлыгы платформасы ярдәмендә дә, мөстәкыйль рәвештә дә үз стартапларын башлап җибәргән студентларның эшләре тәкъдим ителгән», – диде Дамир Галиев, ТР ИВФ директоры.
2024 елда «Ел инновациясе» конкурсында катнашуга студентлар стартапларыннан, технологик компанияләрдән һәм корпорацияләрдән 514 гариза кергән. Иң күп гаризалар (41%) «Перспектива» номинациясендә бирелгән, һәр өченче проект (30%) «Студентлар стартабы» категориясенә карый, катнашучыларның 20% өлеше «Интеллектуаль милек» номинациясендә үз идеяләрен тәкъдим иткән. Гаризаларның якынча 6% өлеше «Технологик компания» категориясендә бирелде, ә 3% өлеше «Корпоратив инновация» номинациясендә проектлар тәкъдим итә.
Катнашучыларда мәгълүмати һәм телекоммуникацион технологияләр юнәлеше аеруча зур кызыксыну уяткан, аңа проектларның 29% өлеше туры килә. Алардан соң биотехнологияләр һәм агросәнәгать комплексы бара — 18%, машина төзелеше, приборлар төзелеше һәм энергетика — 17%, яңа химия, нефть химиясе һәм яңа материаллар — 14%, медицина һәм кеше сәламәтлеге — 12%.
Проектлар арасында 4% – продуктны масштаблаштыру стадиясендә, 5% инде беренче сатуга ия, 18% эш прототибына ия, ә 5% бизнес-идея эшләү стадиясендә.
Технологик компания һәм интеллектуаль милек дигән тагын ике номинация 25 ноябрьдә тыңланачак.