ТР Инвестиция венчур фонды импортны алыштыра торган биш координаталы 3D принтерлар җитештерүне инвестицияләде
Идея туганнан алып проектны тормышка ашыруга кадәр. Татарстан предприятиеләренә оештырылган матбугат туры барышында журналистларга биш координаталы 3D принтер эше турында сөйләделәр, Татарстан Республикасы Инвестиция-венчур фонды аны инвестицияләде.
Чаллы компаниясе Татарстан Республикасы Инвестиция-венчур фондыннан «Старт-1», «Старт-2» һәм «Старт-3» конкурсларында җиңүче булды һәм 9 млн.сум күләмендә финанс алды, Инновацияләргә ярдәм фонды, шулай ук «Сколково» фонды тарафыннан хупланды.
Алынган акча биш күчәрле 3D принтерның лаборатория үрнәген булдыруга, эчке проектны эшләүгә, шулай ук 3D принтерның башкару механизмнарын калибрлау системасына юнәлтелгән.
Биш күчәрле 3D принтер эретелгән полимерны катлам белән пластик продуктлар ясарга мөмкинлек бирә.
Мондый принтерның уникальлеге – борыла-иелә торган өстәл белән җиһазландырылуында, ул элмә элементларны ярдәмчел конструкцияләрсез бастырырга мөмкинлек бирә. 3D басма процессында борыла-иелә торган өстәл басма модель позициясен шундый итеп үзгәртә ки: алга таба һәр катлам инде барлыкка килгән модель җисеменә терәк булып корыла.
Бу җиһазны кулланучылар материалларның чыгымнарын уртача 26% киметә, традицион 3D принтерлар белән чагыштырганда җитештерүчәнлекне 2 тапкырга арттыралар, һәм принтер хаталарын бетерү өчен кул хезмәтен кулланудан баш тарталар.
Биш күчәрле 3D принтерлар нефть-газ җиһазлары, оборона комплексы, радиоэлектроника, тимер юл транспорты, авиа-космик тармак өлкәсендә җитештерү предприятиеләре тарафыннан кулланыла ала. Техника шулай ук прототиплар ясауда, вак серияле җитештерүдә һәм технологик җиһазлар җитештерүдә кулланылырга мөмкин.
Татарстан Республикасы Инвестиция-венчур фонды директоры урынбасары вазыйфаларын башкаручы Гадел Гыйлаҗиев билгеләп узганча, Татарстан Республикасы Инвестиция-венчур фондыннан инвестицияләр хисабына Чаллы компаниясе продукт эшли һәм төзи алган, һәм хәзер үк Россия Федерациясенең эре сәнәгать компанияләреннән игътибар һәм кызыксыну җәлеп иткән. «Хәзер команда тармакта үз продуктын сынау рәвешендә кертергә әзерли, бу Россия оешмаларына чит ил программа тәэминатын алмаштырырга ярдәм итәчәк, шулай ук урыннарда элек чит илдән кертелгән детальләр һәм комплект детальләре җитештерергә ярдәм итәчәк», – дип ассызыклады фонд вәкиле.
Старт җитәкчесе Сергей Сарапулов сүзләренчә, компания ассортимент линейкасын киңәйтергә планлаштыра. «Кулланучылар безгә машиналарның нинди типлары кирәк булуы турында белдерә, безнең продуктны куллану өлкәсен арттыру һәм әлеге җайланмада төзеләчәк эшләнмәләрнең мөмкинлекләрен киңәйтү өчен аларга яңа таләпләр куя. Киләсе елда без югары температуралы пластиклар белән бастырырга сәләтле принтерның киң форматлы версиясен чыгарырга планлаштырабыз, һәм алар нәкъ менә авиакосмос тармагында кулланыла ала торган эшләнмәләр булачак», – сөйләде Сарапулов. Ул шулай ук, киләчәктә стартап әлеге продуктны экспортка җибәрүгә чыгарырга планлаштыра, дип тә билгеләп үтте.