2024 елда Россия венчур форумын үткәрү датасы билгеле
Илнең венчур индустриясенең иң зур вакыйгасы – Россия венчур форумы 2024 елның 26 апрелендә узачак. Чара «Казан Экспо» халыкара күргәзмә үзәгендә узачак. Татарстан Республикасы Премьер-министры Алексей Песошин тиешле күрсәтмәне имзалаган.
Ел саен форум Казанда эре венчур фондларын, дәүләт һәм шәхси үсеш институтларын, инвесторларны, бизнес-фәрештәләрне һәм стартапларны җыя. Венчур базары уенчылары индустриянең агымдагы чакырулары, яңа трендлар, венчур инвестицияләре структурасындагы үзгәрешләр һәм Россиядә һәм халыкара аренада тармакның киләчәк үсеше өчен стратегик бурычлар турында фикер алышалар.
2023 елда Россия венчур форумына 3000нән артык катнашучы килгән иде. Фикер алышуларның төп темалары Россиянең технологик үсеше өчен карарлар булды. Форум барышында 16 түгәрәк өстәл утырышы узды, 150гә якын спикер – экспертлар һәм базар лидерлары чыгыш ясап, Россиядә венчур трансформациясенең яңа формалары, үзара эш итү модельләре һәм механизмнары, яңа заманда дәүләт корпорацияләренең һәм шәхси инвесторларның роле, шулай ук яңа базарларны үзләштерү һәм импортны алмаштыру турында фикер алыштылар.
Чара кысаларында Евразия инновацияләр фондының акселерация программасына һәм ТР ИВФның «Старт-2» программасына стартаплар сайлап алынды. Сайлап алу нәтиҗәсендә 5 финалист «Идея-1000» программасы һәм ЕЦИ акселераторы кысаларында бизнесны үстерүгә инвестицияләр алды.
РВФ Казанда 2005 елдан бирле үткәрелә. Форумны уздыру дәверендә эш программасында һәм экспозициядә 2400 дән артык компания һәм 700 дәр артык стартап катнашкан.
Россия венчур форумы Татарстан Республикасы Хөкүмәте ярдәме белән үткәрелә, форумны Татарстан Республикасы Инвестиция-венчур фонды, Венчурлы инвестицияләү ассоциациясе һәм Евразия инновацияләр үзәге оештыра.